Футбол бўйича Ўзбекистон миллий терма жамосига ким мураббий бўлиши мумкин?

 

Ўтган вақт давомида Ўзбекистон футбол ассоциацияси бир нечта хорижлик ва маҳаллий мураббийлар номзодини кўриб чиқди. Сўнгги хабарларга кўра, португалиялик Карлуш Кейруш номзоди ҳам кўрсатилган, лекин у айни пайтда оиласи билан Мозамбикда экани ва бу ердан ҳали кетиш нияти йўқлигини айтган. Мураббийлар кенгаши, экспертлар таҳлили ва тавсияларига кўра, айни пайтда, миллий терма жамоамиз бошқарувига тажрибали словениялик мураббий Сречко Катанес номзоди кўриб чиқилмоқда.

 

Сречко Катанец ким?

 

58 ёшли мутахассис дастлаб Словениянинг «Любляна» клубида ўйнаган.  1981 йилдан 1988 йилгача эса Югославиянинг «Олимпия», «Динамо» ва «Партизан» клубларида тўп сурган. 1988 йилда Германиянинг «Штутгарт» жамоасига кўчиб ўтди ва у ерда бир мавсум тўп сурди.  У «Штутгарт» клуби билан Европа чемпионлар лигаси финалчисига айланади. Мавсум тугагач, Италиянинг «Сампдория» жамоасига ўтди. Бу клуб билан Сречко Катанес Италия чемпионлиги билан бир қаторда Италия кубоги ва супер кубогини ҳам қўлга киритди. Футболчилик фаолиятини якунлаганидан сўнг мураббийлик билан шуғулланди. У дастлаб «Горитса» ва «Олимпиакос» клубларида ишлади. Шунингдек, Македония (2006-2009й.), Бирлашган Араб Амирликлари (2009-2011й.), Словения (2013-2017й.), Ироқ (2018-2021й.) терма жамоаларини бошқарди. У словенларни Европа ва жаҳон чемпионатларига олиб чиқди. Аммо Словения жаҳон чемпионатида  барча учрашувларда мағлубиятга учраганидан сўнг Катанец лавозимидан четлатилди.

 

Мутахасис фикри

Даврон Файзиев, футбол шарҳловчиси:

 

- Футбол мухлислари Сречко Катанецнинг мураббий бўлиш эҳтимоли ҳақидаги хабарни илиқ қарши олди. У ҳам Европа, ҳам Осиёни кўрган, билган мутахассис. Ўз жамоасини жаҳон ва Европа чемпионатига олиб чиққан. Қаерда ишламасин, барқарор фаолият олиб борган. Ироқ терма жамоси ўйинини ўзгартира олган. Ироқ, ҳатто, Эрон билан ўйинда устунлик қилган.

 

                   Мураббий қанча ойлик олади?

 

Ўзбекистон футбол ассоциацияси 2018 йилда аргентиналик мураббий Эктор Купер билан уч йилга шартнома имзолаган эди. Терма жамоамиз Қатарда бўладиган жаҳон чемпонатига чиқадиган бўлса, шартнома яна бир йилга узайтириларди. Бироқ бу режа амалга ошмаганидан сўнг 62 ёшли мутахассис истеъфога чиқди. Ўшанда Купернинг бир йиллик маоши 2 миллион евро атрофида бўлгани айтилди. Аргентиналик мутахасис кетганидан кейин терма жамоага Вадим Абрамов келди, бироқ жамоамиз жаҳон чемпионатининг сўнгги босқичига ҳам етиб боролмади.

 

Маълумотларга қараганда, Абрамов мураббийлик вақтида ойига 250 миллион сўм маош олган. Аммо бўлажак мураббийнинг қанча маош олиши ҳақида ҳозирча маълумот йўқ. Катанецнинг сўнгги иш жойи — Ироқдаги  йиллик маоши 1,2 миллион еврога тенг бўлган. Бу ойига 1 миллиард 250 миллион сўм дегани. Агар Катанец энг камида Ироқда олган маошини талаб қилса, Ўзбекистон у учун Абрамовникидан 5 барабар кўп пул тўлаши керак бўлади.

 

Жамшидбек Амиров