Иқлим ўзгариши, энергия инқирози, озиқ-овқат ва ўғит нархларининг кўтарилиши шароитида бу йил очарчилик рекорд даражага етди. Бу ҳақда “Euronews” ёзмоқда.
Жаҳон озиқ-овқат дастурига кўра, йил бошидан буён дунёда очликдан азият чекаётган одамлар сони 63 миллионга ошиб, 345 миллион кишига етган.
БМТ экспертларининг фикрича, кейинги 3 ой ичида тўйиб овқатланмаслик Сомали аҳолисининг камида 41 фоизини қамраб олади. 16 октябрда нишонланадиган Бутунжаҳон озиқ-овқат куни муносабати билан ташкилот вакиллари эътиборни қийин аҳволда бўлган минтақага қаратишга ҳаракат қилмоқда.
Сомали ўтган ноябр ойидан бери кучли қурғоқчиликдан азият чекмоқда, бу миллиондан ортиқ фуқарога таъсир кўрсатган. Айниқса, ўткир очарчилик мамлакатнинг жанубий ва марказий ҳудудларига таҳдид солмоқда. Ички кўчирилганлар учун лагерларда тоза сув етишмаслиги вабо ва қизамиқ тарқалиши хавфи ошган.
Шарқий Африкада ҳар 36 сонияда 1 киши очликдан ўлиши кутилмоқда. Сомалидан ташқари Кения, Эфиопия, Жанубий Судан ва бошқа мамлакатларда ҳам вазият ёмонлашмоқда.
