Россия поездга зарба берди: Европанинг юқори мартабали амалдорлари ҳудуд яқинида бўлган
Борис Жонсон, Германия канцлери маслаҳатчиси Гюнтер Зауттер ва Швециянинг собиқ бош вазири Карл Билдт Украинадан қайтаётган бўлган.
13 сентябрь куни Россия қўшинлари Полша чегарасидан бир неча километр узоқликда ҳаракатланаётган йўловчи поезди локомотивига дрон билан зарба берди. Ҳужум оқибатида ҳеч ким жабрланмаган.
Украина темир йўллари маълумотига кўра, поезд бригадаси ҳужум хавфи ҳақида олдиндан огоҳлантирилган. Поезд тўхтатилган ва йўловчилар эвакуацияга тайёрланган.
Der Spiegel нашрининг ёзишича, ҳужумга учраган поезд яқинида Украинадан Полшага йўл олаётган махсус темир йўл таркиби ҳам бўлган. Унда Буюк Британиянинг собиқ бош вазири Борис Жонсон ҳамда Германия канцлери Фридрих Мерцнинг яқин маслаҳатчиларидан бири Гюнтер Зауттер бўлган.
Хавф бекор қилингач, поездлар ҳаракатини давом эттирган.
Украинадан темир йўл орқали қайтаётган Швециянинг собиқ бош вазири Карл Билдт ҳам Полша чегараси яқинидаги ҳужум акс этган видеони X ижтимоий тармоғига жойлаштирди.
“Бу бизнинг поездимиз эмас эди, у биздан бир неча дақиқа кейин чегарадаги ўтиш пунктидан ўтган поезд эди”, — деб ёзди Билдт.
У Украина темир йўлларида йўлга қўйилган хавфсизлик тизими қурбонларнинг олдини олишга ёрдам берганини таъкидлади.
11–12 сентябрь кунлари Киевда YES (Yalta European Strategy) конференцияси бўлиб ўтди. Унда Европанинг қатор сиёсатчилари ҳам қатнашган.
Дрон поездга ва Украина-Полша чегараси яқинидаги ёнилғи қуйиш шохобчасига ҳужум қилганидан сўнг Украина ташқи ишлар вазири Андрей Сибига Европа давлатларини Россияга нисбатан санкция босимини кучайтиришга чақирди.
“Россиялик варварлар аллақачон остонангизда, азиз ҳамкорлар”, — деди Сибига.
