Ҳозиргача комиссия аъзолари томонидан келиб тушётган таклифлар кўриб чиқилди.
Бундан ташқари, йиғилиш қатнашчилари таҳлиллари тингланди. Хусусан, Ўзбекистон Республикаси Олий Мажлиси қонунчилик палатаси аъзоси Шарофиддин Назаров икки муҳим масалада таклиф берди.
Биринчидан, ҳукуматнинг парламентдаги чиқишлари масаласини конституцион мустаҳкамлаб қўйиш тавсия қилинди. Бунда сўнгги йилларда ижро ҳокимияти вакилларининг парламентдаги чиқишлари таҳлил қилинди.
Конституциявий комиссия раиси Акмал Cаидов ушбу таклифни қўллаб-қувватлади.
“Бу мамлакат сиёсий ҳаётида парламентнинг ролини оширади. Парламент назорати кучайишига сабаб бўлади”, – деб қайд этди раис.
Иккинчи таклиф бола ҳуқуқлари бўйича вакил сайланиши масаласини конституцияда мустаҳкамлаш масаласида бўлди. Бу ҳам комиссия аъзолари томонидан маъқулланди ва кўриб чиқиш учун Қонунчилик палатасига жўнатилди.
Акмал Саидов 21 июнь куни ЮНЕСКО билан ҳамкорликда бола ҳуқуқлари бўйича йирик тадбир ўтказишини маълум қилди. Унда 40 дан ортиқ давлатлар конституцияларида бола ҳуқуқларининг акс этиши масаласи кўриб чиқилади. Бу борада якуний хулоса ҳамда таклифлар берилади.
Аввалроқ Конституцияга ўзгартириш бўйича таклифлар юзасидан энг фаол партиялар маълум бўлганди.