Инсон аъзолари савдосида гумон қилинаётган Украина фуқароси Полшадан Қозоғистонга экстрадиция қилинди. Бу ҳақда Қозоғистон Республикаси Бош прокуратураси маълум қилди.
Маълумотларга кўра, мазкур шахс 2017–2018 йилларда инсон аъзолари ноқонуний олди-сотдиси билан шуғулланган халқаро уюшган жиноий гуруҳ таркибида фаолият олиб борган.
Тергов материалларига асосан, жиноий гуруҳ тирик инсонларнинг тана аъзолари савдоси бўйича жами 56 та ноқонуний битим тузган. Ушбу битимлар доирасида трансплантация амалиётлари Қозоғистон Республикасининг соғлиқни сақлаш муассасаларида амалга оширилган.
Украиналик аёл жорий йил март ойида Полша ҳудудида қўлга олинган. Полша томони тақдим этган маълумотларга кўра, мазкур жиноий гуруҳ фаолияти оқибатида Қозоғистон, Арманистон, Озарбайжон, Украина, Қирғизистон, Тожикистон, Ўзбекистон ҳамда Таиланднинг жами 56 нафар фуқароси жабр кўрган ва уларнинг буйраклари олиб қўйилган.
Ҳозирда ушбу иш бўйича тергов ҳаракатлари давом эттирилмоқда.