Ироқ сув танқислиги сабаб нефтини сувга айирбошламоқчи
Мамлакат Туркия билан сув ресурслари бўйича кенг кўламли ҳамкорлик келишувига эришди.
Сўнгги ўн йилликларда энг оғир сув танқислигига дуч келган Ироқ Туркия билан сув ресурсларини бошқариш ва инфратузилмани ривожлантириш бўйича йирик ҳамкорлик келишувига эришди. Ушбу ташаббус мамлакатдаги кескин экологик ва ижтимоий муаммоларни юмшатишга қаратилган.
Келишувга кўра, Туркия компаниялари Ироқ ҳудудида сув омборлари ва дамблар қурилиши билан шуғулланади. Мазкур лойиҳалар Ироқнинг нефть экспортидан тушадиган маблағлар ҳисобидан молиялаштирилади. Шу билан бирга, Ироқ ҳукумати сув ресурслари устидан тўлиқ суверенитет сақлаб қолинишини алоҳида таъкидламоқда.
БМТ маълумотларига кўра, мамлакатда кучайиб бораётган қурғоқчилик ва экологик муаммолар оқибатида 168 мингдан ортиқ аҳоли ўз уй-жойини тарк этишга мажбур бўлган. Шунингдек, минглаб фермерлар сув етишмаслиги сабаб деҳқончилик фаолиятини тўхтатган.
Мутахассислар ушбу келишув Ироқнинг сув хавфсизлигини таъминлашда муҳим қадам бўлиши мумкинлигини, бироқ узоқ муддатли барқарорлик учун минтақавий ҳамкорлик ва самарали бошқарув ҳал қилувчи аҳамиятга эга эканини қайд этмоқда.
