Копенгагендаги Ироқ элчихонаси олдида ўта миллатчи «Даниялик ватанпарварлар» гуруҳи вакиллари митинг ўтказди. Тадбир давомида улар Қуръонни ёқиб юборишган, деб хабар берди Anadolu агентлиги.
Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида уюштирганини айтишмоқда. Агентлик маълумотларига кўра, намойишга полиция қаршилик кўрсатмаган.
Эслатиб ўтамиз, жорий йилнинг январь ойида ҳам Стокҳолмдаги Туркия элчихонаси олдида Қуръон ёқиб юборилган эди. Акцияни ўта ўнг ва исломга қарши «Қаттиқ курс» партиясининг даниялик-швед фаоли Расмус Палудан бошқарган. Шунингдек, июнь ойида ҳам ироқлик муҳожир Стокҳолмдаги бош масжид ёнида Қуръонни ёқиб юборган эди.