Исроил Мадримов АҚШда ўтган профессионал бокс оқшомида 11-ғалабасини қўлга киритди
У Доминикан Республикаси вакили Луис Давид Салазарга қарши ўтказилган жангда тўлиқ 10 раунд давомида устунликни сақлаб қолди.
АҚШнинг Лас-Вегас шаҳрида ташкил этилган профессионал бокс оқшомида супер ярим ўрта вазн тоифасида рингга чиққан Исроил Мадримов навбатдаги муваффақиятини қайд этди. У Доминикан Республикаси вакили Луис Давид Салазарга қарши ўтказилган жангда тўлиқ 10 раунд давомида устунликни сақлаб қолди.
Баҳс якунида ҳакамлар бир овоздан (99:91, 99:91, 99:91) ғалабани Мадримовга беришди. Жанг давомида ўзбекистонлик боксчи техник ва тактик жиҳатдан рақибидан устун бўлиб, ташаббусни қўлдан бой бермади. Ушбу жангда унга Ўзбекистон аёллар бокс терма жамоаси бош мураббийи, собиқ боксчи Элшод Расулов ҳамроҳлик қилди.
30 ёшли Исроил Мадримов шу пайтгача профессионал рингда 14 та жанг ўтказиб, 11 та ғалаба, 1 та мағлубият ва 2 та дуранг натижа қайд этган. Луис Давид Салазар учун эса бу фаолиятидаги иккинчи мағлубият бўлиб, унинг ҳисобида 20 та ғалаба мавжуд.
Эслатиб ўтамиз, Мадримов аввалроқ — 2025 йил 23 февраль куни Саудия Арабистонида WBC Interim чемпионлик камари учун америкалик Вержил Ортисга қарши жанг қилиб, ҳакамлар қарори билан имкониятни бой берган эди. Лас-Вегасдаги ушбу ғалаба эса унинг чемпионлик пойгасига қайтаётганини кўрсатмоқда.
