Президент Шавкат Мирзиёевнинг Туркияга расмий ташрифи доирасида Ўзбекистон ва Туркия раҳбарлари ташаббуси билан Истанбул шаҳрида Ўзбекистон Республикаси умумтаълим мактаби қурилишига тамал тоши қўйилди.
Мазкур маросимда Мактабгача ва мактаб таълими вазири Эъзоза Каримова ҳамда вазирликнинг масъул ходимлари иштирок этди.
600 ўринли ушбу таълим муассасаси Ўзбекистон Республикасининг хорижда ташкил этилаётган илк давлат умумтаълим мактаби ҳисобланади. Мактабда ўқув жараёни ўзбек тилида, Ўзбекистоннинг амалдаги умумтаълим дастурлари асосида олиб борилиши режалаштирилган.
Мазкур лойиҳа Ўзбекистон ва Туркия ўртасидаги таълим ва маданий-гуманитар ҳамкорликни янги босқичга олиб чиқиб, икки қардош халқ ўртасидаги мустаҳкам дўстлик ва стратегик шерикликнинг амалий ифодаси бўлиб хизмат қилади.