Жаҳон банки Россия билан боғлиқ барча лойиҳаларини бекор қилди
Молия институти Москванинг Украинадаги сиёсатидан норози эканини маълум қилган.
Жаҳон банки Украинадаги вазият фонида Россия ва Беларусдаги барча дастурларини тўхтатди. Бу ҳақда "РИА Новости" хабар берди.
"Жаҳон банки жамоаси Россияга 2014 йилдан буён янги кредит ёки инвестиция ажратмаган. Шунингдек, 2020 йил ўрталаридан Беларусь учун ҳам янги кредитлар бериш тўхтатилган.
Россиянинг Украинага бостириб кириши ортидан Жаҳон банки жамоаси РФ ва Беларусдаги дастурларини дарҳол тўхтатди", — дейилади ташкилот баёнотида.
Маълумот ўрнида: Россия 24 февраль куни Украинада ҳарбий операция бошлагач, Ғарб Москвага қарши янги санкциялар жорий этди. Чекловларнинг аксарияти молия бозорига қарши қаратилган. Хусусан, Россиянинг бир қатор банклари АҚШ, Европа ва Буюк Британия қора рўйхатига киритилди, шунингдек, SWIFT тизимидан узиб қўйилди.
Эслатиб ўтамиз, аввалроқ АҚШ РФ нефть саноатига санкция жорий этгани тўғрисида хабар берилганди.
