Қўқондаги уйда ҳам портлаш юз берди. Қурбон бор
Портлаш оқибатида 4 киши шаҳар тиббиёт бирлашмасига ётқизилган.
16 февраль куни соат 21:18 да Қўқон шаҳрида жойлашган Муқимий кўчасидаги кўп қаватли уйда ёнғин содир бўлгани ҳақида «112» тизими орқали Фарғона вилояти Фавқулодда вазиятлар бошқармасига хабар келиб тушган. Бу ҳақда ФВБ матбуот хизмати хабар берди.
Ёнғин-қутқарув экипажлари ҳодиса жойига соат 21:23 да етиб борган. Ёнғин 21:25 да ўраб олиниб, 21:32 да тўлиқ бартараф этилган.
Дастлабки маълумотларга кўра, ҳодиса газ ва ҳаво аралашмасининг чақнаши оқибатида юзага келган. Ёнғин натижасида 28-уйда тахминан 50 квадрат метр майдонда том ва шифт қисми ҳамда уй жиҳозлари зарарланган.
Чақнаш оқибатида 4 нафар фуқаро турли даражада куйиш тан жароҳатлари олиб, шаҳар тиббиёт бирлашмасига ётқизилган. Кўрсатилган тиббий ёрдамга қарамасдан, 1 нафар фуқаро вафот этган.
Айни пайтда ҳодисанинг келиб чиқиш сабаблари юзасидан суриштирув ишлари олиб борилмоқда.
