Россия Ташқи ишлар вазирлиги расмий вакили Мария Захарова ўз изоҳида Эстония бош вазири Каи Калласнинг касбий тайёргарлиги ва инсон ҳуқуқлари соҳасидаги билимини танқид қилди.
Аввалроқ Эстония бош вазири Россия фуқароларига туристик виза беришни тўхтатиш зарурлигини айтиб, Европага ташриф буюришни “инсон ҳуқуқи эмас, имтиёз” деб атаган эди.
Захарованинг сўзларига кўра, халқаро амалиётда инсоннинг ҳаракатланиш эркинлигини таъминловчи қатор ҳужжатлар мавжуд. У ЙХҲТ таъсис шартномалари, Фуқаролик ва сиёсий ҳуқуқлар тўғрисидаги халқаро пакт, Инсон ҳуқуқлари декларацияси, Инсон ҳуқуқлари бўйича Европа конвенсияси қоидаларини эслатиб ўтди.
Эстония ташқи ишлар вазири Урмас Реинсалу ЕИнинг Россия Федерациясига қарши санкциялари навбатдаги пакетига россияликлар учун кириш визалари беришни тақиқлаш таклифини билдирганди.