Наманганда болалар доридан заҳарлангани ростми? Вилоят ССБ қўшимча маълумот берди
Аслида, йод ва анструмин (йодамарин) дориси 3 ёшдан 15 ёшгача бўлган болалар ўртасида йод танқислигининг олдини олиш ва болаларни ақлий ривожланишини яхшилаш мақсадида берилган.
Наманган вилоятида заҳарланган болаларнинг ҳолати қониқарли, улардан 20 нафарининг аҳволи яхшилангани сабабли уйига рухсат берилди. Бу ҳақда Наманган вилояти Соғлиқни сақлаш бошқармаси хабар берди.
Қайд этилишича, 21 сентябрь куни соат 16:00 дан бошлаб, Чуст тумани тиббиёт бирлашмаси қабулхона бўлимига тумандаги боғчалар ва мактаблардан болалар тана ҳароратини кўтарилиши, айримларида қорин оғриғи, ич сурилиши ва қусиш шикоятлари билан келишган.
Бошқарма томонидан зудлик билан ишчи гуруҳ тузилиб, суриштирув ва текширув ишлари олиб борилди. Ҳозирги вақтга қадар 20 нафар боланинг ҳолати яхши бўлганлиги сабаб, уйига рухсат берилди. Қолган болалар ҳолати назоратда.
“Кеча ва бугун болалар боғчаларида болаларга йод ва анструмин (йодамарин) дориси берилган. Заҳарланиш шундан бўлган, деган хабар текширувда. Сабаби, бутун Республикага тарқатилган ушбу дори воситаси 3 ёшдан 15 ёшгача бўлган болалар ўртасида йод танқислигининг олдини олиш ва болаларни ақлий ривожланишини яхшилаш мақсадида берилган. Вилоятимизни бошқа ҳудудларида ҳам болалар ушбу дорини истеъмол қилган. Уларда ҳеч қандай салбий ҳолатлар кузатилмаган. Мурожаат келиб тушмаган”, — дейилади хабарда.
Айтилишича, шифохонага ётқизилган болаларнинг ҳеч бирида ранимацион, яъни оғир ҳолат йўқ. Воқеанинг келиб чиқиш тафсилотлари мутахассислар томонидан ўрганилмоқда. Барча текширувлар хулосаси чиққач якуний маълумот берилади.
Хабарда шунингдек, болалар нимадан заҳарлангани ҳали номаълум бўлгани сабабли жамоатчиликдан нотўғри ва турли тахминларга асосланган хабарларни тарқатмаслик сўралган.
