Наманганда “Энергосавдо” юрисконсульти 2000 доллар пора билан ушланди
У электр тармоғига ноқонуний уланганлик ҳолати бўйича ҳисобланган жаримани йўқ қилиб бериш евазига пул талаб қилган.
Бош прокуратура ҳузуридаги Иқтисодий жиноятларга қарши курашиш департаментининг маълум қилишича, Косонсой тумани бўлими ҳамда бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “Энергосавдо” бўлими юрисконсульти M.M. пора олган вақтда қўлга олинди.
Тадбир жараёнида аниқланишича, M.M. ўз хизмат вазифасидан фойдаланиб, “Сойча” маҳалла фуқароси хонадонида электр тармоғига ноқонуний уланиш ҳолати бўйича тузилган далолатнома асосида ҳисобланган 28,6 миллион сўмлик жаримани йўқ қилиб бериши эвазига 2 000 АҚШ доллари пулини олган. Бу ҳолат ашёвий далиллар билан тасдиқланди.
Ҳозирда M.M. га нисбатан Жиноят кодексининг 168-моддаси (фирибгарлик) билан жиноят иши қўзғатилди ва тергов ҳаракатлари давом этмоқда.
