Наманганда фуқароларни хорижга ишга юборишни ваъда қилган фирибгарлар ушланди
Улар Корея ва Словакияга ишга жойлаштириш баҳонасида 2 минг доллар ва 40 миллион сўм талаб қилган.
Наманган шаҳрида фуқароларга хорижда иш топиб беришни ваъда қилиб, уларнинг ишончини суиистеъмол қилган шахслар қўлга олинди. Бу ҳақда Бош прокуратура ҳузуридаги Департамент хабар берди.
Маълум қилинишича, Департаментнинг Наманган шаҳар бўлими ва Давлат хавфсизлик хизмати ходимлари ҳамкорлигида ўтказилган тезкор тадбирлар давомида икки ҳолатда фирибгарлик жиноятлари фош этилган.
Биринчи ҳолатда фуқаро М.А. ўзини ишга жойлаштириш билан шуғулланувчи сифатида таништириб, фуқаролар М.С. ва А.К.га Жанубий Кореяга ишга юборишни ваъда қилган. У бу хизмат эвазига 2 минг АҚШ доллари талаб қилган ва 1 минг долларни олаётганда ашёвий далиллар билан ушбу жойнинг ўзида қўлга олинган.
Иккинчи ҳолатда эса фуқаро Р.М. фуқаро М.Б.дан Словакияга ишга юборишни ташкил этиш баҳонасида 40 миллион сўм миқдорида келишув тузган. У ушбу маблағнинг бир қисмини — 600 АҚШ доллари ва 2,8 миллион сўмни олаётган вақтда ҳуқуқни муҳофаза қилувчи органлар томонидан ушланган.
Мазкур ҳолатлар юзасидан терговга қадар текширув ишлари бошланган бўлиб, далиллар асосида Ўзбекистон Республикаси Жиноят кодексининг 168-моддаси (фирибгарлик) бўйича жиноят иши қўзғатилди.
Ҳозирда тергов ҳаракатлари давом эттирилмоқда.
