АҚШ президенти Доналд Трамп Норвегия бош вазири Ёнас Гар Сторага йўллаган мактубида тинчлик бўйича Нобел мукофоти унга берилмагани сабабли, энди “фақат тинчлик ҳақида ўйлаш” мажбуриятини ҳис қилмаслигини билдирган. Трампнинг сўзларига кўра, у саккиздан ортиқ урушнинг олдини олганига қарамай, Нобел қўмитаси уни эътибордан четда қолдирган ва бу ҳолат унинг ташқи сиёсатга муносабатига таъсир қилган. Бу ҳақда Reuters ҳабар бермоқда.
Мактубда Трамп яна Гренландия мавзусига тўхталиб, Дания оролни Россия ёки Хитойдан ҳимоя қила олмаслигини иддао қилган. Унинг таъкидлашича, Гренландия устидан “тўлиқ ва мутлақ назорат” ўрнатилмас экан, дунё хавфсизлиги таъминланмайди. АҚШ раҳбари, шунингдек, Гренландияга Даниянинг мулк ҳуқуқи борлиги ҳақида ҳеч қандай ёзма асос мавжуд эмаслигини ҳам қайд этган.
Ёнас Гар Сторе мактубни 18 январь куни олганини тасдиқлади. Унинг айтишича, ушбу хат у ва Финляндия президенти Александр Стубб томонидан Трампга юборилган, Европа давлатларига нисбатан бож жорий этиш таҳдидлари бўйича изоҳ сўралган қисқа мурожаатга жавоб сифатида келган. Европа Иттифоқида эса АҚШнинг эҳтимолий тарифларига жавоб чоралари муҳокама қилинмоқда.
Трампнинг Гренландия борасидаги қатъий баёнотлари НАТО ичида ҳам, ЙИ–АҚШ савдо муносабатларида ҳам жиддий тарангликни юзага келтирди. Европа етакчилари вазиятни дипломатик йўл билан ҳал этиш тарафдори эканини айтмоқда, бироқ зарурат туғилса, иқтисодий жавоб чораларини кўришга тайёр эканини ҳам яширмаяпти.