Нью-Йорк мэри Мадурони ҳибсга олишга қарши чиқди
Зохран Мамдани Трамп билан боғланиб, Мадуронинг қўлга олинишини режимни зўравонлик билан ўзгартиришга уриниш деб баҳолади.
Нью-Йорк шаҳри мэри Зохран Мамдани Доналд Трамп билан телефон орқали боғланиб, Венесуэла президенти Николас Мадуро ва унинг рафиқасининг қўлга олиниши ортидан амалга оширилган ҳаракатларга қарши эканини маълум қилди.Бу ҳақда Anadolu нашри хабар берди.
Мамдани матбуот анжуманида сўзлар экан, мазкур қўнғироқ орқали АҚШнинг Венесуэладаги ҳаракатларини “ҳокимиятни зўравонлик билан алмаштиришга уриниш” сифатида баҳолаганини ва бунга қатъий норозилик билдирганини айтди.
«Мен президентга бевосита қўнғироқ қилиб, ушбу ҳаракатга қарши эканимни очиқ айтдим. Бундай амаллар федерал ва халқаро ҳуқуқ меъёрларига зид бўлиб, улар доимий ва бир хил тарзда ҳурмат қилиниши керак», — деди Мамдани.
Аввалроқ у X ижтимоий тармоғидаги саҳифасида АҚШнинг Венесуэладаги операциясини «уруш ҳаракати» ва «очиқдан-очиқ режимни ўзгартиришга уриниш» деб атаган эди.
Мернинг таъкидлашича, Венесуэлага нисбатан амалга оширилаётган бундай сиёсат нафақат хориждаги вазиятга, балки Нью-Йоркда яшаётган ўн минглаб венесуэлаликларга ҳам бевосита таъсир кўрсатиши мумкин.
«Бизнинг устувор вазифамиз — Нью-Йорк аҳолиси, жумладан венесуэлалик диаспоранинг хавфсизлигини таъминлашдир. Шаҳар маъмурияти вазиятни диққат билан кузатишда давом этади», — дея қўшимча қилди у.
