Озарбайжон Президенти Илҳом Алиев 5 январь куни маҳаллий телеканалларга берган интервьюсида мамлакатининг Марказий Осиё билан Ғарб ўртасидаги алоқадаги ролини таъкидлади. Президентнинг сўзларига кўра, бугунги кунда Марказий Осиё ва Озарбайжон интеграцияси, шунингдек С5 минтақасининг С6 йўналишига айланиши, нафақат минтақа, балки бутун дунё учун муҳим аҳамиятга эга.
“Транспорт, логистика ва алоқа йўналишлари кўплаб етакчи халқаро актёрлар учун марказий аҳамият касб этади. Шу нуқтаи назардан, Марказий Осиёни Ғарб билан боғлашга қодир ягона ишончли мамлакат Озарбайжондир”, – деди Илҳом Алиев.
Президент шунингдек, географик жиҳатдан бошқа йўналишлардан фойдаланиш мумкинлигини тан олган, бироқ ҳозирги геосиёсий вазиятни ҳисобга олган ҳолда, Ғарб учун муқобил йўналишларни мақбул деб ҳисоблаш қийинлигини қайд этди. Шу сабабли, Озарбайжоннинг тирик кўприк ва ишончли шерик сифатидаги роли ортиб бораётгани, йирик лойиҳаларни амалга ошириш салоҳиятини амалда кўрсатиб келаётгани таъкидланди.