Мактабгача ва мактаб таълими вазирлиги томонидан нуфузли ва минтақавий халқаро фан олимпиадаларида ғолиб бўлган ўқувчилар ҳамда уларнинг устозларини тақдирлаш маросими бўлиб ўтди.
Қайд этилишича, жорий йилда Ўзбекистон терма жамоаси халқаро фан олимпиадалари тарихида энг юқори натижани қайд этиб, жами 210 та медални қўлга киритди. Ушбу натижа юртимиз ёшлари илм-фан соҳасида изчил олиб борилаётган ислоҳотларнинг амалий самарасидир.
Маълум қилинишича, 2025 йилда ўзбекистонлик ўқувчилар 29 та нуфузли ва минтақавий халқаро фан олимпиадаларида иштирок этиб, 40 та олтин, 78 та кумуш ва 92 та бронза, жами 210 та медалга сазовор бўлди.
Хусусан, энг нуфузли халқаро олимпиадалар доирасида жами 13 та медаль қўлга киритилиб, янги рекорд қайд этилди. Жумладан:
Бирлашган Араб Амирликларида 96 давлат иштирокида ўтказилган Халқаро кимё олимпиадасида — 2 та олтин, 2 та кумуш;
Австралияда 105 давлат иштирокида ўтказилган Халқаро математика олимпиадасида — 4 та кумуш, 1 та бронза;
Боливияда 90 дан ортиқ давлат иштирокида ўтказилган Халқаро информатика олимпиадасида — 1 та кумуш, 1 та бронза;
Париж шаҳрида 96 давлат иштирокида ўтказилган Халқаро физика олимпиадасида — 2 та бронза медаль қўлга киритилди.
Алоҳида эътироф этиш жоизки, Абу Али ибн Сино номидаги ихтисослаштирилган мактаб ўқувчиси Далер Раҳимов бир нечта нуфузли халқаро олимпиадалардаги олтин медаллари учун жами қарийб 1 миллиард 40 миллион сўм миқдорида мукофот билан тақдирланди. Худди шунингдек, ушбу таълим муассасасининг яна бир ўқувчиси Миржаҳон Мухаммадов ҳам халқаро олимпиадалардаги ютуқлари учун қарийб 1 миллиард 40 миллион сўм мукофотга сазовор бўлди.
Шунингдек, Ўзбекистон ўқувчилари Тошкент шаҳрида ўтказилган Ал-Хоразмий номидаги Халқаро математика ва информатика олимпиадасида 50 та медаль, Абу Райҳон Беруний номидаги халқаро кимё олимпиадасида эса 19 та медаль билан умумжамоа ҳисобида етакчи ўринни эгаллади.
Маълумот учун, халқаро фан олимпиадаларида қўлга киритилган медаллар сони йиллар кесимида барқарор ўсиб бормоқда:
2019 йилда — 30 та, 2020 йилда — 25 та, 2021 йилда — 45 та, 2022 йилда — 41 та, 2023 йилда — 96 та, 2024 йилда — 128 та медаль.
Жорий йилда халқаро фан олимпиадалари ғолиблари ва уларнинг устозларини рағбатлантириш учун давлат буджетидан 12 миллиард 424 миллион сўмга яқин маблағ ажратилди. Бу кўрсаткич 2019 йилга нисбатан қарийб 17,5 баробар кўпдир.