Ўзбекистонда СOVID-19'га қарши 12 ёшдан катта болалар ҳам ихтиёрий эмланади

 

 

Коронавирусга қарши Pfizer вакцинасининг 12-15 ёшдаги болаларда ўтказилган клиник синовларининг натижалари мазкур вакцинанинг юқори даражада самарадорлиги ва хавфсизлигини кўрсатди.

 

Жаҳон соғлиқни сақлаш ташкилоти томонидан 12 ёшдан юқори болаларни ва ўсмирларни Pfizer вакцинаси билан эмлаш тавсия этилди.

 

Ўзбекистон Республикаси Бош давлат санитария врачи ва миллий техник иммунологик эксперт комиссияси қарорига асосан, юртимизда ота-оналар ва васийларининг розилиги асосида, ихтиёрий равишда 12 ёшдан катта болаларни Pfizer вакцинаси билан эмлаш имконияти мавжуд.

 

Демак бизнинг юртимизда ҳам 12 ёшдан катта болалар шифокор кўригидан ўтгач, коронавирусга қарши Pfizer вакцинаси билан эмланиши мумкин.

 

Маълумот учун, шу йил 13 сентябрь куни мамлакатимизга 1 200 000 доза Pfizer/BioNTech вакцинаси олиб келинган.

 

Айни кунгача мамлакатимизда жами 19 969 345 доза вакцинадан фойдаланилди. Шу кунгача тўлиқ эмланган фуқаролар 4 283 645 нафарни ташкил қилмоқда.

 

 Бундан аввал Ўзбекистонда “Sputnik V”ни қабул қилиш оралиғи ва унинг иккинчи компонентлари қачон келтирилиши маълум бўлгани ҳақида хабар берилганди.

 

                                                                             

Чўлпоной Аҳмедова