Ўзбекистонда ҳам “Овоз” телешоуси ўтказилади. Бу ҳақда Маданият вазирлиги хабар берди.
Қайд этилишича, лойиҳада бир мавсум 4 ой давом этади. Унда Ўзбекистон ва Қорақалпоғистон халқ артисти Озодбек Назарбеков, Ўзбекистон ва Татаристон халқ артисти Фаррух Зокиров, Ўзбекистонда хизмат кўрсатган артистлар Севара Назархон ҳамда Тоҳир Содиқов телешоуда мураббийлик қилишади.
Лойиҳа Ўзбекистондаги иқтидор эгаларини аниқлаш ва саралаш имконини берувчи платформага айланади ва Маданият вазирлиги гарчи ғолиб бўлиш насиб этмаган бўлсада, лойиҳа орқали назарга тушан истеъдодларнинг кейинги фаолиятига ғамхўрлик кўрсатишни йўлга қўяди.
Ҳар бир мавсум ғолиби КИА автомобили билан тақдирланади. Финалчилар билан продюсерлик шартномалари тузилади, овоз ёзиш студияларида қўшиқлари бепул ёзиб берилади, мусиқий альбомларини чиқаришларига кўмаклашилади.
Лойиҳада ёши, миллати, тили, ижтимоий мансублиги, мусиқий билим бобида профессионал билимга эга ёки ҳаваскорлигидан қатъий назар барча иштирок этиши мумкин.
Таъкидланишича, Ўзбекистон ушбу телелойиҳани намойиш этиш ҳуқуқини қўлга киритган дунёдаги 76-мамлакатга айланди.