Сўнгги кунларда мамлакатимизда ҳарорат инверсияси билан боғлиқ ноқулай метеорологик шароитлар оқибатида ҳаво сифати пасайиши кузатилмоқда. Бу ҳақда Экология ва иқлим ўзгариши миллий қўмитаси раиси ўринбосари Искандар Қутбиддинов маълумот берди.
Унинг таъкидлашича, кундузги ва кечки ҳаво ҳарорати айрим ҳолларда 14 градусгача кескин фарқ қилиши, туман тушиши ва шамол тезлигининг пасайиши ифлослантирувчи моддаларнинг атмосфера ҳавосида тарқалишини қийинлаштирмоқда.
Махсус комиссия ўз фаолиятини тўхтатмаган бўлиб, аҳолига мунтазам ахборот бериш, шунингдек, тегишли ташкилотлар фаолиятини мувофиқлаштириш билан шуғулланмоқда. Бугунги кунда эътибор саноат ва хўжалик субъектларида экологик рейдлар ва назорат тадбирларига қаратилган. Ноқулай об-ҳаво шароитида атмосфера ҳавосига антропоген юкламани камайтириш мақсадида корхоналарнинг қувватлари чекланмоқда ва айрим корхоналар фаолияти вақтинча тўхтатилмоқда.
1–7 январ кунлари Тошкент шаҳридаги 12 та ва Тошкент вилоятидаги 22 та ишлаб чиқариш корхонасида текширувлар ўтказилиб, таъсирчан чоралар кўрилди. Шу билан бирга, профилактик мониторинг тадбирлари кучайтирилди ва атмосфера ҳавоси сифати тезкор баҳолаб борилмоқда.
Мутахассисларнинг прогнозларига кўра, ноқулай метеорологик шароитлар 16–17 январга қадар сақланиши кутилмоқда. Кейинги ҳафтада антитциклонларнинг келиши, ёғингарчилик ва шамол тезлигининг ошиши билан атмосфера ҳавоси сифати нормаллашиши кутилмоқда.
Махсус комиссия томонидан кўрилаётган барча чоралар илмий асосланган тавсияларга мувофиқ, юзага келган хавфларни минималлаштириш ва аҳолининг экологик хавфсизлигини таъминлашга қаратилган.