Ўзбекистонда коррупция ҳақида хабар берган фуқароларга махсус ордерлар жорий этилади

 

Ўзбекистонда коррупция ҳақида хабар берган фуқароларнинг ҳуқуқларини кафолатлаш ва уларни ҳимоялаш тизимини такомиллаштириш бўйича янги механизмлар жорий этилиши режалаштирилмоқда. Бу ҳақдаги таклифлар Президентга коррупцияга қарши сиёсатни кучайтириш бўйича янги чора-тадбирлар доирасидаги йиғилишда тақдим этилди.

 

Маълумотларга кўра, 2024 йилда 31 нафар фуқаро коррупция ҳолатлари ҳақида хабар берган. Қонунчиликда белгиланган пул компенсацияси кўзда тутилган бўлсада, амалиётда уларга асосан фақат миннатдорчилик хатлари берилган. Сўровлар аҳолининг қарийб 30 фоизи ҳимоя механизмлари етарли эмаслиги сабабли қоидабузарликлар ҳақида хабар беришдан қўрқишини кўрсатмоқда. Шу боис, хабар берувчиларни ҳимоя қилиш мақсадида махсус ордерлар жорий этилиши таклиф этилди.

 

Йиғилишда юқори бюрократик ва рақамлаштирилмаган соҳаларда коррупция хавф манбаларини аниқлаш учун лойиҳа офисларини ташкил этиш таклиф қилинди. Уларнинг фаолияти натижалари мунтазам равишда жамоатчиликка тақдим этиб борилади.

 

Шунингдек, инвестиция лойиҳаларини мониторинг қилишдан тортиб, қурилиш жараёнларини жойида назорат қилишгача бўлган коррупцияга қарши тадбирларга жамоатчилик иштирокини кенгайтириш таклиф қилинмоқда. Фуқароларнинг фаоллигини рағбатлантириш мақсадида “Коррупцияга қарши курашга қўшган ҳиссаси учун” мукофот нишонини таъсис этиш режалаштирилган.

 

Йиғилишда солиқ маъмуриятчилигини рақамлаштириш масаласи ҳам алоҳида кўриб чиқилди. Президент ҚҚСни автоматлаштирилган ҳисоб-китоб тизимига ўтиш жараёнини тезлаштириш ва инсон омилидан келиб чиқадиган хатоларни камайтиришни топширди.