Ўзбекистонда Хитойдан олиб кирилаётган мандарин ва ананас мевалари импортига вақтинчалик тақиқ жорий этилди. Бу ҳақда Карантин ва ўсимликларни ҳимоя қилиш агентлиги маълум қилди.
Қайд этилишича, мазкур қарор Хитойдан етказиб берилаётган мевали маҳсулотлар партияларида ўсимликлар карантини объектларининг мунтазам аниқланаётгани билан боғлиқ. Импорт қилинган мандарин ва ананасларнинг танлаб олинган намуналари Марказий фитосанитария лабораториясида экспертизадан ўтказилган.
Лаборатория текширувлари натижасида цитрус оқ-қаноти (Диалеуродес ситри Ашмеад), Шарқ цитрус қалқондори (Унаспис яноненсис Кувана) ҳамда ананас унсимон қурти (Дйсмисоссус бревипес Соскерелл) каби карантин остидаги зарарли организмлар аниқланди. Ушбу зараркунандалар 20 га яқин юк партияларида қайд этилгани маълум қилинди.
Зарарланган маҳсулотлар аниқлангани ҳақида Хитой Халқ Республикасининг ўсимликлар карантини ва ҳимояси бўйича миллий ташкилоти расман хабардор қилиниб, тегишли ҳужжатлар ва маълумотлар тақдим этилди.
Тақиқ амал қилаётган даврда Хитойдан олиб келиниши режалаштирилган мандарин ва ананас маҳсулотлари учун карантин рухсатномаларини расмийлаштириш вақтинча тўхтатилди. Мазкур чекловлар тақиққа сабаб бўлган омиллар тўлиқ бартараф этилгунга қадар амал қилади.
Ушбу чоралар Ўзбекистон ҳудудига хавфли карантин организмларининг кириб келиши ва тарқалишининг олдини олиш мақсадида жорий этилди.