Ўзбекистоннинг Озарбайжондаги элчихонаси яна бир бор мамлакатимиз халқаро ташувчиларини юк автомобиллари ҳайдовчиларига нисбатан тақиқ мавжуд эмаслигини олдиндан текшириш амалиётини жорий этишни тавсия қилмоқда, деб хабар бермоқда "Дунё" АА мухбири.
Ушбу тавсия "Юқори Ларс" назорат-ўтказиш пункти орқали Грузия-Россия чегарасини кесиб ўтиш вақтида ҳайдовчиларнинг Россия ҳудудига киришига рухсат берилмаётгани ҳолатлари давом этаётганига асосланмоқда.
Бундай ҳаракатларга чегарани кесиб ўтаётган ҳайдовчи бундан аввалроқ Россия қонунчилигини бузгани, шу жумладан, турли жарималарни тўламагани учун депортация қилинганлар рўйхатига киритилгани сабаб бўлмоқда. Шунингдек, юз бераётган ушбу ҳолатлар COVID-19 пандемиясига қарши курашиш доирасида қабул қилинган чекловлар сабабли ҳам мураккаблашмоқда.
Ўз навбатида, ўзбекистонлик дипломатлар ҳар бир ҳолат бўйича ҳуқуқий ёрдам кўрсатиш, ватандошлар манфаатларини ҳимоя қилиш борасида мақсадли саъй-ҳаракатларни амалга оширмоқда.
Шу муносабат билан, элчихона яна бир бор мамлакатимиз халқаро юк ташувчиларидан Россия ҳудудига, шу жумладан, Озарбайжон ва Грузия орқали ташувларни амалга оширишдан олдин ҳайдовчиларга хорижий мамлакатга кириш учун тақиқ мавжуд эмаслигини текшириб кўришни сўрайди.