Паралимпия ўйинлари чемпионига Андижондан 2 хонали уй берилди
Андижон шаҳридаги Заҳириддин Муҳаммад Бобур номли майдонда “Токио-2020” ёзги Паралимпия ўйинлари иштирокчилари ва ғолибини тақдирлашга бағишланган тадбир ўтказилди.
Тадбирда Андижон вилояти ҳокими Шуҳратбек Абдураҳмонов иштирок этди.
Вилоят ҳокими Президентимиз фармонига асосан «Ўзбекистон ифтихори» фахрий унвони билан тақдирланган, паралимпия чемпиони ва рекордчиси Бобуржон Омоновга Андижон шаҳридаги 16 қаватли янги уйдан 2 хонали квартира совға қилди.
Эслатиб ўтамиз, пара енгил атлетика мусобақасининг Ф41 классида ядро улоқтириш баҳсларида қатнашган Бобуржон Омонов 14,06 метр натижа қайд этиб, чемпионликни қўлга киритди. Шу билан бирга, ядро улоқтириш бўйича паралимпия рекордини янгилади.
Маълумот ўрнида: Андижон вилоятидан “Токио-2020” паралимпия ўйинларига 6 нафар спортчи йўлланма олган эди.
Аввалроқ МДҲ ўйинларида спортчиларимиз 91 та медаль билан умумжамоа ҳисобида иккинчи ўринни қўлга киритгани ҳақида хабар берган эдик.
Жамшидбек Амиров
