Президент Шавкат Мирзиёев Ислом Каримов ҳайкали пойига гулчамбар қўйди
Маросимда Қуръон тиловати қилиниб, дуо ўқилди. Самарқанд ва Қарши шаҳарларидаги ҳайкалларга ҳам гуллар қўйилди.
30 январ куни Президент Шавкат Мирзиёев Тошкент шаҳрида Биринчи Президент Ислом Каримов ҳайкали пойига гулчамбар қўйиб, унинг хотирасига эҳтиром билдирди.
Тарихий хотира миллат келажагининг мустаҳкам пояси сифатида ёдга олинди. Ўзбекистоннинг мустақил давлат сифатида шаклланиши ва давлатчилик асосларининг барпо этилишида Биринчи Президент Ислом Каримовнинг беқиёс хизматлари ҳурмат билан эсланди.
Давлат раҳбари ташаббуси билан Самарқанд шаҳрида Ислом Каримов мақбараси барпо этилди ва унинг таваллуд топган 30 январ санаси нишонлаш эзгу анъанага айланди.
Маросим давомида Қуръон тиловати қилинди, дуо ўқилди ва Биринчи Президентнинг Ватан манфаатлари йўлидаги фаолияти ҳамда инсоний фазилатлари ёдга олинди.
Ислом Каримов номидаги илмий-маърифий ёдгорлик мажмуасида Олий Мажлис палаталари, Президент Администрацияси ва ҳукумат вакиллари, шунингдек, илм-фан ва маданият намояндалари ҳамда жамоатчилик вакиллари иштирок этди. Шунингдек, Самарқанд ва Қарши шаҳарларидаги Биринчи Президент ҳайкаллари пойига ҳам гуллар қўйилиб, хотирасига эҳтиром кўрсатилди.
