Қашқадарё вилоятининг Яккабоғ туманида блогер ҳамда фермерлар ўртасида жанжал чиқди. Ҳолат юзасидан вилоят ИИБ маълумот берди.
Кеча, 26 май куни соат 22:30 ларда Яккабоғ тумани Ибн Сино МФЙ ҳудудида жойлашган Пилла маҳсулотини сақлаш омборхонасида пиллаларни қабул қилиб олиш жараёни олиб борилаётган вақтда ўзини блогер “Elmurodblog” деб таништирган фуқаро О.Э. пилла топшириш масканига борган.
Шу ерда фермерларнинг ишига аралашиб, уларга турли номуносиб савол жавоблар қилиши оқибатида ўрталарида жанжал келиб чиққан. Ушбу жараёнда фуқаро О.Э. фермерларни ҳақорат қилган.
Пилла етиштирувчи фермерлар фуқаро О.Э.нинг хатти-ҳаракатлари юзасидан Яккабоғ туман ички ишлар бўлимига мурожаат қилган.
Ҳолат масъул ходимлар томонидан атрофлича ўрганилиб, фуқаро О.Э.га нисбатан Маъмурий жавобгарлик тўғрисидаги кодекснинг 183-моддаси ҳамда 198-моддаси 1-қисми билан маъмурий баённома расмийлаштирилиб, тўпланган ҳужжатлар қонуний тўхтамга келишлик учун жиноят ишлар бўйича Яккабоғ тумани судига юборилган.
“Барча воқеа иштирокчиларининг ҳаракатларига ҳуқуқий баҳо берилиши таъминланади”, — дейилади хабарда.