Қирғизистон АҚШ фуқаролари учун амал қилаётган визасиз режимни қайта кўриб чиқиш масаласини муҳокама қилмоқда. Бу ҳақда Қирғизистон Вазирлар Маҳкамаси раисининг ўринбосари Эдил Байсалов маълум қилди.
Унинг таъкидлашича, АҚШ томонидан Қирғизистон фуқаролари учун янги виза талабларининг жорий этилиши ўзаро, яъни “ойнага ўхшаш” муносабатни талаб қилади.
“Давлат департаменти Қирғизистон фуқароларидан виза аризасини топшириш чоғида 15 минг долларгача виза депозитини тўлашни талаб қилувчи янги тартибларни эълон қилганидан сўнг, биз АҚШ фуқаролари учун жорий этилган визасиз режимни қайта кўриб чиқишни бошлашимиз керак”, — деди Байсалов.
У виза сиёсати тенглик ва ўзаро ҳурмат тамойилларига асосланиши лозимлигини алоҳида таъкидлади.
“Виза сиёсати — бу тенглик ва ўзаро ҳурмат масаласидир. Агар фуқароларимизга нисбатан бундай юқори тўсиқлар қўйилса, биз бу ҳолатни эътиборсиз қолдира олмаймиз”, — деди у.
Маълум қилинишича, АҚШ томонидан виза қоидаларининг кучайтирилиши фонида 21 январдан бошлаб Қирғизистон, Туркманистон ва Тожикистон фуқаролари АҚШга кириш визасига ариза топширишда 5 мингдан 15 минг долларгача миқдорда депозит киритиши шарт бўлади. Депозит суммаси виза суҳбатининг натижаларига қараб белгиланади ва унинг тўланиши виза берилишига кафолат бермайди.
Ҳозирча АҚШ расмийлари Қирғизистон томонининг ушбу баёнотига нисбатан расмий муносабат билдирмаган.