Бухорода 5 ёшли қизалоқ эҳтиёцизлик қурбони бўлди. Zamon.uz суд ҳужжати билан танишди.
Суд ҳукмида келтирилишича, 44 ёшли М.Н. 2023 йилда Ғиждувон туманида оиласи учун уй-жой қурдирган. Сўнг ҳожатхона чиқиндиларини оқизиб юбориш мақсадида умумий фойдаланишда бўлган кўча бўйида 3 метрли қудуқ қазитган. 2025 йил 6 сентябр куни, соат 18:20 ларда М.Н га қўшни бўлган Қ.А.нинг қизи шу кўчада ўйнаб юриб челак устига чиққан ва қудуқ ичига тушиб кетган. Оқибатда, қизалоқ ўткир заҳарланишдан вафот этган.
“Моддий ҳолатим туфайли қудуқ оғзини ёпиш учун махсус қопқоқ сотиб олмагандим. Усталар қудуқнинг атрофини бетон қоришмаси билан қоплаш вақтида бўёқ челагини ағдариб қўйганди. Бундан мақсад - бетон қоришмаси қудуқ ичига сизиб ўтишини олдини олиш эди. Челакни олиб махсус қопқоқ ўрнатмоқчи эдик. Орадан йиллар ўтган бўлса ҳам бу ишни қилолмадим. Лекин шу пайтгача қопқоқ масаласида бирорта муаммо бўлмаганди”, - дейди у суддаги кўрсатмасида
Шунингдек, М.Н. марҳума қизнинг отаси билан ўрталарида адоват ёки келишмовчилик бўлмаганини қайд этиб, суддан енгиллик сўраган. Жабрланувчи томон эса қудуққа челак ағдариб қўйилганига эътибор бермаганини, қўшнисига даъвоси йўқлигини билдирган.
2026 йил 16 январ куни ЖИБ Ғиждувон туман суди судланувчи М.Н. Жиноят Кодексининг 102-моддаси 1-қисми(эҳтиёцизлик орқасида одам ўлдириш) билан айбли деб топилиб, унга 3 йил муддатга озодликни чеклаш жазоси тайинланди.
Қайд этиш лозим, Вазирлар Маҳкамасининг 2011 йил 342-сонли қарорига кўра, кўчалар бўйида ҳаракат хавфсизлигини таъминлашга тааллуқли бўлмаган бино ва иншоотларни қуриш тақиқланган, коммуникация тармоқларини тўғридан-тўғри йўл тўшамасида жойлаштириш мумкин эмас.
Шаҳзод Ўроқбоев