Қозоғистон Ички ишлар вазирлиги Олмаота шаҳрида янги туғилган чақалоқларни ноқонуний савдо қилишда гумон қилинган уюшган жиноятчилик гуруҳи аниқланиб, фаолияти тўхтатилганини маълум қилди.
Вазирлик маълумотларига кўра, мазкур схема ташкилотчилари ёш аёлларнинг оғир ижтимоий аҳволидан фойдаланиб, уларни фарзандларини учинчи шахсларга пул эвазига топширишга ундаган. Ҳуқуқни муҳофаза қилиш органлари гуруҳнинг барча аъзоларини ҳибсга олган.
Тергов жараёнида 20 дан ортиқ жиноий иш қўзғатилган. Гумонланувчиларга 18 йилгача озодликдан маҳрум этиш ва мол-мулкини мусодара қилиш жазоси қўлланилиши мумкин.
Шунингдек, Абай вилоятида мажбурий меҳнат билан шуғулланган гуруҳ фаолияти бўйича ҳам тергов олиб борилмоқда. Ушбу ҳолат юзасидан 11 та жиноий иш очилган. Чимкент, Ақтўбе, Жамбил, Ғарбий Қозоғистон, Қарағанда ва Қўстанай вилоятларидаги тунги клубларда ўтказилган текширувлар давомида вояга етмаганларни ҳам ўз ичига олган эксплуатация ҳолатлари аниқланган.