Қозоғистоннинг Чимкент шаҳрида ҳуқуқни муҳофаза қилувчи органлар томонидан йирик халқаро наркотрафик тармоғи фаолияти тўхтатилди. Операция давомида ушбу жиноий гуруҳ таркибига кирган 24 нафар шахс қўлга олинди. Улар орасида Ўзбекистон, Афғонистон ва Россия фуқаролари ҳам мавжуд.
Қозоғистон бош прокурори Берик Асиловнинг маълум қилишича, гиёҳванд моддалар савдоси билан боғлиқ ушбу жиноий схемага 300 нафардан ортиқ шахс жалб этилган. Тармоқ аъзолари Телеграм мессенжери орқали наркотик воситаларни тарқатиш билан шуғулланган, янги аъзоларга эса ноқонуний препаратларни ишлаб чиқариш бўйича кўрсатмалар берган.
Тергов маълумотларига кўра, гуруҳ жуда катта миқёсда фаолият юритган: фақат икки нафар айбланувчининг ноқонуний савдо айланмаси 7 миллион доллардан ошган. Пул маблағлари «дроппер»лар карталари ва лицензиясиз криптобиржалар орқали ўтказилиб, хорижий шахслар фойдасига ечиб олинган.
Амалий тадбирлар давомида Чимкент шаҳридаги иккита дорихона фаолияти тўхтатилиб, у ердан олти килограммдан ортиқ тайёр мепҳедрон, сотишга мўлжалланган қадоқланган дозалар, икки тоннадан зиёд прекурсорлар ҳамда дори воситалари ишлаб чиқариш ускуналари олиб қўйилди.
Мазкур суриштирувга Қозоғистон тезкор-тергов гуруҳи билан бир қаторда АҚШ Наркотикларга қарши кураш бошқармаси ходимлари ҳам жалб этилгани қайд этилди.