Олмаота шаҳрида қозоғистонлик аёлларни ҳақорат қилган икки нафар россиялик блогер маъмурий жавобгарликка тортилиб, 15 суткага қамоққа олинди. Бу ҳақда 24.kg нашри хабар берди.
Қозоғистон Республикаси Бош прокуратураси маълумотига кўра, мазкур ҳодисадан сўнг Ички ишлар вазирлиги томонидан қўшимча равишда жиноий иш ҳам қўзғатилган.
Бош прокурор ўринбосари Галимжан Койгелдиевнинг таъкидлашича, гумондорлар майда безориликда айбланмоқда. Шу билан бирга, Қозоғистон Республикаси Жиноят кодексининг 174-моддаси — миллатлараро нафрат қўзғатиш аломатлари бўйича тергов ҳаракатлари олиб борилмоқда.
Маҳаллий ОАВ хабарларига кўра, блогерлар Ринат Пашаев ва Анар Абдуллаев Олмаотадан эфирга узатилган жонли чиқиш вақтида қозоғистонлик аёллар ҳақида ҳақоратли сўзлар ишлатган. Кейинчалик улар ўз хатоларини тан олиб, жамоатчиликдан узр сўраган.
Олмаота ихтисослаштирилган туманлараро маъмурий суди қарорига кўра, блогерларга 15 суткалик маъмурий қамоқ жазоси тайинланган.
Мазкур ҳолат Қозоғистон жамоатчилиги орасида кескин норозиликларга сабаб бўлгани қайд этилди.