Тошкентда банк эксперти пора билан қўлга олинди
У 1 миллиард сўмдан ортиқ кредит ажратиб бериш учун тадбиркордан пул талаб қилган.
Тошкент шаҳрида йирик миқдорда пора олиш билан боғлиқ жиноят фош этилди. Бу ҳақда ДХХ хабар берди.
Маълум қилинишича, коррупцияга қарши курашиш доирасида Давлат хавфсизлик хизмати Тошкент шаҳар бошқармаси ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган.
Тадбир давомида пойтахтда фаолият юритувчи йирик акциядорлик тижорат банкларидан бирининг катта эксперти хизмат кўрсатиш соҳасида иш юритувчи МЧЖ раҳбаридан 10 минг АҚШ доллари миқдорида пулни тамагирлик йўли билан олаётган вақтида ашёвий далиллар билан ушланган.
Тергов маълумотларига кўра, гумонланувчи ўз танишлари орқали Самарқанд вилоятида жойлашган банклардан биридан мазкур МЧЖга 1 млрд 250 млн сўм миқдорида кредит ажратиб беришни ваъда қилган.
Ҳозирда ушбу ҳолат юзасидан жиноят иши қўзғатилган бўлиб, тергов ҳаракатлари давом этмоқда.
