Қурилиш вазирлиги: Тошкентдаги “9 минг носоз лифт” ҳақидаги хабарлар асоссиз
Вазирлик маълумотига кўра, Тошкентда 9 144 та лифт мавжуд, шундан 1 835 таси янгиланиши лозим.
Ўзбекистон Қурилиш ва уй-жой коммунал хўжалиги вазирлиги ижтимоий тармоқларда тарқалган “Тошкент шаҳрида 9 мингдан ортиқ лифт носоз ҳолатда” деган хабарларни асоссиз деб атади.
Расмий маълумотга кўра, ҳозирда мамлакат бўйича 5 491 та кўп қаватли уйда жами 13 798 та лифт мавжуд. Шундан 12 987 таси йўловчи, 811 таси юк ташишга мўлжалланган.
Тошкент шаҳрида эса 3 245 та кўп қаватли уйда 9 144 та лифт ўрнатилган бўлиб, уларнинг 1 835 тасининг эксплуатация муддати тугаган. Бироқ уларни 2025–2028 йиллар давомида босқичма-босқич янгилаш ишлари Ҳукуматнинг 2025 йил 17 февралдаги 98-сон қарори асосида амалга оширилмоқда.
Жорий йилда 452 та лифтни янгилаш ишлари якунланмоқда.
Вазирликка кўра, мамлакатдаги барча лифтлар ҳар йили мажбурий техник кўрикдан ўтказилади. Кўрикда аниқланган камчиликлар эса лифтлар носоз дегани эмас, балки бу профилактик назорат ва хавфсизликни таъминлашга қаратилган техник жараён ҳисобланади.
Қурилиш ва уй-жой коммунал хўжалиги вазирлиги аҳолининг хавфсизлиги ҳамда қулай яшаш шароитларини таъминлаш мақсадида лифт хўжалиги соҳасида доимий мониторинг олиб бормоқда. Шунингдек, соҳани модернизация қилиш орқали мавжуд муаммоларни бартараф этиш йўлидаги ислоҳотларни изчил давом эттиради.
