Венесуэланинг вақтинча президенти АҚШ талабларига бўйсунмаса, Мадуродан ҳам баттар тақдир кутади — Трамп
АҚШ раҳбари Венесуэладаги амалдаги вазиятни кескин танқид қилиб, мамлакатни “тўлиқ муваффақиятсизликка учраган давлат” деб атади.
АҚШ президенти Доналд Трамп Венесуэла президенти вазифасини бажарувчи Делси Родригесни АҚШ талабларига бўйсунмаган тақдирда, Николас Мадуроникидан ҳам оғирроқ оқибатлар кутиши мумкинлиги ҳақида огоҳлантирди. Бу ҳақда у The Atlantic нашрига берган телефон интервьюсида маълум қилди дейди РБС.
Трампнинг айтишича, агар Родригес “тўғри қарор қабул қилмаса”, у “жуда катта нарх тўлайди ва бу нарх Мадуро тўлаганидан ҳам юқори бўлиши мумкин”. АҚШ раҳбари Венесуэладаги амалдаги вазиятни кескин танқид қилиб, мамлакатни “тўлиқ муваффақиятсизликка учраган давлат” деб атади.
Нашр қайд этишича, Трамп Вашингтон Венесуэладаги ҳозирги сиёсий ҳолат ва режимга нисбатан кескин чоралар кўришга тайёр эканини яширмаган. Унинг сўзларига кўра, “тикланиш ёки режим алмашинуви” ҳар қандай ҳолатда ҳам мавжуд вазиятдан яхшироқ бўлади.
Бунга жавобан Делси Родригес АҚШ баёнотларини рад этиб, Венесуэла ўз табиий ресурсларини ҳимоя қилишини ва ҳеч қачон мустамлакага айланмаслигини таъкидлади. У Николас Мадуро Венесуэланинг ягона қонуний президенти эканини яна бир бор урғулади.
Шу билан бирга, АҚШ Давлат котиби Марко Рубио NBC News телеканалига берган интервьюсида Қўшма Штатлар Венесуэла давлати билан эмас, балки гиёҳванд моддалар савдоси билан шуғулланувчи гуруҳларга қарши кураш олиб бораётганини билдирди. Унинг таъкидлашича, АҚШ томонидан амалга оширилган ҳаракатлар ҳарбий босқин эмас, балки ҳуқуқни муҳофаза қилиш органлари доирасидаги операция ҳисобланади.
