Россия Федерацияси 2027 йилдан эътиборан чет эллик фуқароларни меҳнат фаолиятига жалб этиш бўйича амалдаги қоидаларни кескин ўзгартиришни режалаштирмоқда. Бу ҳақда Россия ОАВлари Ички ишлар вазирлигининг 2026–2030 йилларга мўлжалланган миграция сиёсатини амалга ошириш режаси лойиҳасига таяниб хабар берди.
Янгиланаётган тартибга кўра, мигрантларнинг мустақил равишда Россияга келиши ва иш қидириши тартиби бекор қилиниши мумкин. Унинг ўрнига ташкилий (уюшган) ёллаш тизими жорий этилади.
Янги тизимнинг асосий талаблари қуйидагилардан иборат:
- Чет эллик ишчилар Россияга фақат иш берувчининг расмий таклифи билан кириши мумкин бўлади.
- Келишидан олдин улар ўз мамлакатида тўлиқ текширувлардан ўтиши шарт бўлади.
- Россияга киргач, мигрант мустақил равишда иш излаш ўрнига бевосита таклифнома асосидаги иш жойига бириктирилади.
Мазкур ёндашув Россияда ички демографик ўсишни қўллаб-қувватлаш ва чет эллик ишчи кучидан фақат аниқ эҳтиёж бўлган тақдирда фойдаланиш сиёсатининг бир қисми сифатида изоҳланмоқда. Янги тизимнинг қамрови ҳозирча аниқ белгиланмаган, аммо мутасадди вазирлик мигрантлар оқимининг муҳим қисми босқичма-босқич ушбу механизмга ўтишини истисно қилмаяпти.
Иш берувчилар хорижий ишчиларга бўлган эҳтиёж бўйича олдиндан рўйхат тузадилар ва уни давлат органларига тақдим этадилар. Текширувлардан ўтган мигрантлар таклифнома асосида келиб, ўша заҳоти белгиланган иш берувчига бириктирилади.
Мутахассисларнинг фикрига кўра, бу механизм йирик корхоналар учун қулай бўлиши мумкин. Бироқ кичик ва ўрта бизнес учун мослашувчанликнинг камайиши, режалар ва квоталарга қаттиқ боғлиқлик сабабли муайян қийинчиликлар юзага келиши эҳтимоли бор.
Шу тариқа, Россия миграция сиёсати янада қатъий ва давлат томонидан марказлаштирилган тартибга ўтаётгани қайд этилмоқда. Янги тизимнинг меҳнат бозори ва мигрантлар ҳаётига қандай таъсир кўрсатиши 2027 йилларда маълум бўлади.