Россия томонидан Киевга учирилган ракеталардан бири Озарбайжон элчихонасига тушди

 

2025 йил 14 ноябрь куни Россия Федерациясининг Озарбайжон Республикасидаги Фавқулодда ва мухтор элчиси Михаил Евдокимов Озарбайжон Республикаси Ташқи ишлар вазирлигига чақирилди.

 

Учрашув давомида 14 ноябрь куни тахминан соат 01:00 да Украина пойтахти Киевга қилинган ракета ва дрон ҳужумлари оқибатида Озарбайжоннинг Киевдаги Элчихонаси ҳудудига «Искандер» туридаги ракеталардан бири тушгани муносабати билан Россия томонига қатъий норозилик билдирилди ва тегишли нота-вербал топширилди.

 

Учрашувда ушбу портлаш оқибатида элчихона периметри деворининг бир қисми бутунлай вайрон бўлгани, бинолар, хизмат автомобиллари, маъмурий иншоот ва консуллик бўлимига жиддий зарар етгани, дипломатик ваколатхона ҳудудида катта талафот кузатилгани таъкидланди. Ҳодиса оқибатида инсон талофати йўқлиги қайд этилди.

 

Шунингдек, мазкур ҳужумлар халқаро ҳуқуқ нормалари ва тамойилларига зид экани, бундай ҳолатлар аввал ҳам такрорланган эслатилди. Хусусан:

• 2022 йил 10 март куни Харков шаҳридаги Озарбайжоннинг Фахрий консулхонаси биносига қилинган авиазарбадан сўнг иншоот жиддий зарар кўрган, хизмат автомобили яроқсиз ҳолга келган;
• 2024 йил 2 январ куни Россия томонидан «Кинзҳал» ракетаси билан амалга оширилган ҳужум натижасида элчихона биносидан 35 қадам нарида 3 метрли чуқурлик пайдо бўлган, 8 метр пастликда портламай қолган жанговар қисмлар аниқланган;
• 2025 йил 28 август куни элчихона яқинига қилинган навбатдаги авиазарбадан сўнг маъмурий бино, консуллик бўлими ва элчи резиденцияси зарар кўрган;
• 2025 йил 8 ва 18 август кунлари Одесса вилоятидаги СОСАР нефть омборига дрон ҳужумлари уюштирилиб, ходимлар жароҳатланган ва инфратузилма жиддий шикастланган.

 

Мазкур фактлар ҳужумларнинг эҳтимолий қасддан амалга оширилганига доир жиддий саволлар туғдираётгани таъкидланди.

 

Учрашувда, шунингдек, Озарбайжон томони бу ҳолатлар ҳақида аввал ҳам расмий нота-вербаллар орқали Россия томонини хабардор қилгани, 2022 йил апрель ойидаёқ Украинадаги Озарбайжон дипломатик ваколатхоналарининг координаталари Россия Мудофаа вазирлигига тақдим этилгани эслатиб ўтилди. Ўша пайтда Россия томони мазкур координаталар инобатга олиниши бўйича кафолат берган эди.

 

Йиғилиш якунида Озарбайжон дипломатик ваколатхоналарига қаратилган бундай ҳужумлар мутлақо қабул қилиб бўлмаслиги қатъий таъкидланди. Россия томонидан воқеа юзасидан кенг қамровли тергов ўтказиш ва батафсил изоҳ тақдим этиш сўралди.