Россияда ўзбекистонлик эркак террорчилик режасида айбланиб, 20 йилга қамалди
У террорчилик ҳаракати учун нишонни аниқлаш, кузатув ўтказиш ҳамда портловчи қурилма тайёрлаш учун жой тайёрлаш билан шуғулланган.
Россиянинг Ростов-на-Дону шаҳридаги Жанубий округ ҳарбий суди Ўзбекистон фуқаросини Ставропол ўлкаси ҳукумати биносига нисбатан террорчилик ҳужумини режалаштиришда айбдор деб топди. Суд ҳукмига кўра, у 20 йил муддатга озодликдан маҳрум этилди.
Маълум қилинишича, маҳкум жазонинг дастлабки беш йилини қамоқда, қолган муддатини эса қаттиқ тартибли колонияда ўтайди. Шунингдек, унга 1 миллион рубль миқдорида жарима ҳам белгиланган.
Тергов материалларига кўра, 2023 йил январь ойида эркак Россия Федерациясида тақиқланган “Ислом давлати” террорчилик ташкилоти манфаатлари йўлида ҳаракат қилишга тайёрлигини билдирган видеомурожаат ёзиб олган.
Суд ҳужжатларига кўра, у ташкилот етакчисининг кўрсатмалари асосида Россия ҳудудида террорчилик ҳужуми амалга оширилиши мумкин бўлган аҳоли пунктини танлаш, нишон бўйича разведка ўтказиш ҳамда қўлбола портловчи қурилма тайёрлаш учун зарур биноларни ижарага олиш мажбуриятини олган.
2023 йил 23 сентябрь куни у Ўзбекистондан Россияга келиб, Ставропол шаҳрини танлаганини маълум қилган. Шундан сўнг у бир нечта объектларнинг фото ва видео тасвирларини тайёрлаб, уларни ташкилот вакилларига юборган.
Кейинчалик унга эҳтимолий ҳужум манзили сифатида Ставропол ўлкаси ҳукумат биноси кўрсатилган. 2023 йил декабрь ойида у портловчи мослама тайёрлаш учун зарур бўлган бутловчи қисмларни харид қилиб, уларни яширин жойда сақлаган.
2023 йил 18 декабрь куни у Россия хавфсизлик хизматлари томонидан қўлга олинган. Суд жиноятнинг оғирлигини ҳисобга олиб, энг оғир жазолардан бирини тайинланган.
