Россияга чегарадош давлат НАТОга қўшилиши мумкин
Бу мамлакатда аҳоли фикри кескин ўзгаргани маълум қилинди.
Финляндия ҳукумати НАТОга аъзоликни муҳокама қилиш учун очиқ. Бу ҳақда мамлакат президенти Саули Ниинистё маълум қилди.
"Финляндияда ҳам, Швецияда ҳам вазият ўзгарди. Биринчидан, сўровномалар натижаларига кўра, кўпчилик одамлар НАТОга қўшилишимизни ёқлайди. Шунинг учун биз буни парламентда муҳокама қилишга очиқмиз", — деган у Fox News телеканалига берган интервьюсида.
Унинг қўшимча қилишича, бу масала самарали ва имкон қадар тезкор кўриб чиқилади.
Февраль охирида Финляндия аҳолиси ўртасида ўтказилган сўровномага кўра, 53 фоиз респондентлар Шимолий Атлантика блокига қўшилишни маъқуллаган. Ушбу сўровномани ташкиллаштирган Yle телекомпанияси маълумотларига кўра, НАТОга қўшилиш тарафдорлари 2017 йилдан буён 34 фоизга ошган.
Маълумот ўрнида: Финляндия ҳарбий жиҳатдан нейтрал давлат ҳисобланади. У шу пайтга қадар ҳам Россия, ҳам Ғарб билан яхши алоқаларга эга бўлган. Хельсинки ЕИ аъзоси бўлса-да, НАТОга кирмаган. Аммо Россиянинг Украинадаги ҳарбий операцияси аста-секин альянс томон харакатларга сабаб бўлмоқда.
Эслатиб ўтамиз, аввалроқ Украина гуманитар ҳалокат ёқасида тургани тўғрисида хабар берилганди.
