Бугун Ўзбекистон Республикаси Президенти Администрацияси раҳбари Саида Мирзиёева Тошкент шаҳридаги ҳавонинг ифлосланиш даражасини камайтириш бўйича йиғилиш ўтказди. Тадбирда Администрация ҳамда алоқадор идоралар раҳбарлари иштирок этди ва пойтахтдаги экологик вазиятни баҳолади.
Йиғилишда сўнгги кунларда ҳавонинг юқори даражада ифлосланаётгани, аҳоли саломатлиги учун хавф туғдираётгани қайд этилди. Масъуллар фуқаролардан келиб тушган мурожаатлар, жамоатчилик таклифлари ва ҳаво сифатини яхшилаш бўйича ҳисоботларини тақдим этди.
Саида Мирзиёева эксперт хулосаларига таянган ҳолда тезкор, ўрта ва узоқ муддатли чора-тадбирларни белгилади. Улар орасида экологик назоратни кучайтириш, ифлослантирувчи объектлар фаолиятини чеклаш, қурилиш талабларини қатъийлаштириш, шаҳарни кенг кўламда кўкаламзорлаштириш ва ҳаво сифатини мониторинг қилиш тизимини жорий этиш киради.
Белгиланган чора-тадбирлар яқин орада давлат раҳбарига тақдим этиладиган Президент Фармони лойиҳаси учун асос бўлиб хизмат қилади. Ушбу қадамлар аҳоли саломатлигини ҳимоя қилиш ва атроф-муҳитни яхшилашга қаратилган бўлиб, амалиётга жорий этилиши кутиляпти.