Самарқандда банкдан қарздор фуқаронинг машинаси хатланди
Фуқаро қидирувдаги машинасини кечки вақтларда бошқариб юрган.
Фуқаролик ишлари бўйича Самарқанд шаҳар судининг ижро варақасига асосан, Мажбурий ижро бюросининг Иштихон тумани бўлими иш юритувида жавобгар фуқаро Ф.Э.га нисбатан ижро ҳужжати келиб тушган.
Ушбу ҳужжатга кўра, жавобгар Ф.Э.дан даъвогар “Капиталбанк” АЖ фойдасига 297 миллион сўм миқдоридаги қарз ундирилиши лозим.
Қарздор томонидан белгиланган ихтиёрий муддат ичида ижро ҳужжати талаблари бажарилмагани сабабли, амалдаги қонунчиликка мувофиқ, унга тегишли “Malibu 2” русумли автотранспорт воситасига қидирув эълон қилинди.
Кейинчалик давлат ижрочиси томонидан амалга оширилган тезкор чора-тадбирлар натижасида қарздорга тегишли “Malibu 2” автомашинаси фақат кечки вақтларда ҳаракатланаётгани аниқланди.
Ҳозирда мазкур автомашина белгиланган тартибда вақтинча сақлаш учун жарима майдончасига жойлаштирилган бўлиб, ижро ҳужжатининг тўлиқ ижросини таъминлаш мақсадида тегишли чора-тадбирлар давом эттирилмоқда.
