2 август куни икки нафар вояга етмаган шахс томонидан ўғирланган автомобил воситасида бир нечта ҳудудда жиноят содир этилди. Воқеа давомида Ички ишлар органлари ходимларига оғир тан жароҳатлари етказилган. Ҳолат юзасидан Жиноят кодексининг бир нечта моддалари бўйича иш қўзғатилди.
Дастлабки маълумотларга кўра, Андижон вилояти, Хўжаобод туманида яшовчи 2007 йилда туғилган икки нафар йигит Самарқанд шаҳридан Наманган вилоятига бориш мақсадида йўловчи сифатида Cobalt русумли автомобилга чиққан. Сирдарё вилояти ҳудудида ҳайдовчи қисқа муддатга автомобилдан чиққан пайтда, улар машинани олиб қочиб кетган.
Мазкур воқеа юзасидан 102 хизматига хабар келиб тушгач, тезкор чоралар кўрилиб, барча ЙПХ постларига огоҳлантириш юборилган. Бироқ автомобил давлат рақам белгисиз ҳаракатланганлиги боис аниқлаш ишлари мураккаблашган.
Соат 04:24 да оқ рангли, давлат рақамисиз Cobalt автомобили Бўка тумани ҳудудидаги ЙПХ постида тўхтатилган, бироқ ҳайдовчи ҳужжат текширувидан сўнг постдаги бошқа йўлак орқали машинани бошқариб номаълум томонга кетган.
Орадан кўп ўтмай, Бўка тумани ИИБ жиноят қидирув бўлинмасининг тезкор ходими ушбу автомобилни аниқлаб, тўхтатишга уринган. Шу пайтда жиноятчилардан бири унга пичоқ билан тан жароҳати етказган. Улар Cobalt’ни ҳодиса жойида ташлаб кетиб, ходимга тегишли Matiz автомобилни олиб қочган.
Жиноятчилар Тошкент вилояти, Оҳангарон туманига кириб келганида ЙПХ ходими томонидан тўхтатилмоқчи бўлган, аммо улар тўхташга бўйсунмасдан, хизмат автомобили билан ЙПХ ходимини уриб юборган. Ходим оёқ қисмидан жароҳат олиб, шифохонага ётқизилган.
Олиб борилган тезкор излаш ҳаракатлари натижасида гумонланувчилар Оҳангарон шаҳри ҳудудида қўлга олинди.
Тергов ҳаракатлари давом этмоқда.
Жиноят кодексининг 267-моддасига кўра, транспорт воситасини ўғирлаш 5 йилдан 20 йилгача озодликдан маҳрум қилиш билан жазоланади.