Трамп учта йирик ОАВга Оқ уйга киришни тақиқлади: журналистлар судга мурожаат қилди

CNN, Politico ва MS NOW Оқ уй ҳудудига кириш тақиқлангани сабабли АҚШ президенти Дональд Трамп маъмуриятини судга берди. ОАВ вакиллари мазкур қарор матбуот эркинлигига таҳдид солаётганини таъкидламоқда, дея ёзди Аl Jazeera.

 

Учала ахборот ташкилоти душанба куни қўшма баёнот бериб, журналистларнинг Оқ уйга кириш ҳуқуқи ҳеч қандай огоҳлантириш ёки тегишли тартиб-таомилсиз бекор қилинганини маълум қилди. Кейинчалик уларнинг даъво аризаси Вашингтондаги федерал судга топширилди.

 

ОАВ вакилларининг таъкидлашича, ҳукумат уларнинг журналистик материалларидан норози бўлгани учун бундай чорани қўллаган. Улар бу ҳолатга қаршилик кўрсатилмаса, матбуот эркинлиги ва жамоатчиликнинг ҳукумат аралашувидан холи мустақил ахборот олиш ҳуқуқига таҳдид туғилишини билдирган.

 

Шунингдек, АҚШнинг ABC, CBS, CNN, Fox ва NBC телеканаллари Трампнинг айрим тадбирларини ёритишда қўлланадиган навбатма-навбат тасвирга олиш (поол) тизимидаги иштирокини тўхтатганини маълум қилди.

 

АҚШ вице-президенти Ж.Д. Вэнс эса ОАВларга нисбатан қўлланган чекловни ҳимоя қилди. Унинг сўзларига кўра, бу сўз эркинлигига қарши қаратилган чора эмас, балки Оқ уй ичидаги махсус кириш имкониятини чеклашдир. Вэнс тақиқ «тарғибот»га қарши қаратилганини айтди.

 

Президент Дональд Трамп эса тақиқни «сохта янгиликлар»га қарши чора сифатида изоҳлади. У Truth Social тармоғидаги постида бундай ахборотни АҚШ миллий хавфсизлигига таҳдид деб атади.

 

Оқ уй мухбирлари ассоциацияси Трамп маъмуриятини CNN, Politicо ва MS NOW журналистларининг Оқ уйга кириш имкониятини зудлик билан тиклашга чақирди. Ташкилотнинг таъкидлашича, бирор ОАВни унинг ёритиш сиёсати ҳукуматга маъқул келмагани учун четлатиш амалиёти келажакда бошқа нашрларга ҳам қўлланиши мумкин.

 

Маълумотларга кўра, Трамп маъмурияти аввал ҳам айрим йирик ахборот ташкилотларининг Оқ уйга киришини чеклаган ва маъмуриятга нисбатан хайрихоҳ деб қаралаётган янги медиа платформаларига кўпроқ имконият берган.