Сирдарёда ноқонуний балиқ овловчилар аниқланди
Улар ҳайвонот дунёсига 25 млн зарар етказган.
Сирдарё вилоятининг Оқдарё туманида ноқонуний балиқ овловчилар аниқланди. Бу ҳақда Табиат ресурслари вазирлиги Сирдарё вилояти бошқармаси хабар бермоқда.
Маълум қилинишича, фуқаролар A.T. ва A.A. Оқолтин тумани «А.Тоиров» ЦИУ ҳудудидан оқиб ўтувчи катта марказий зовурдан электр қармоқ ёрдамида 6 турдаги жами 26 дона (2 дона оқ амур, 6 дона оқ сла, 4 дона дўнгпешона, 10 дона оққайроқ, 1 дона товонбалиқ ва 3 дона бошқа турдаги) балиқларни ноқонуний равишда овлаган.
Тунги рейд тадбирида ҳуқуқбузарлардан бир дона резина қайиқ, бир дона аккумулятор, электр қармоқ ва овланган балиқлар ашёвий далил сифатида олиб қўйилган.
Мазкур ҳолат юзасидан фуқаролар A.T. ҳамда A.A.гa нисбатан маъмурий баённомалар расмийлаштирилиб, “Ҳайвонот дунёсини муҳофаза қилиш ва ундан фойдаланиш тўғрисида”ги қонуннинг 35- ва 53-моддалари талаби бузилиши оқибатида ҳайвонот дунёсига 25 740 000 сўм зарар етказилганлиги ҳисобланган.
“Мазкур ҳолат юзасидан тўпланган ҳужжатлар ҳуқуқий баҳо бериш мақсадида суд органларига тақдим этиш учун тайёрланмоқда”, — дейилади хабарда.
