Сирдарё вилоятида экин майдонларини сув билан таъминлашни яхшилаш мақсадида “Султонҳовуз” номли йирик сув омбори барпо этилади. Президент Шавкат Мирзиёев 4 декабрь куни Халқ депутатлари Сирдарё вилояти Кенгашининг навбатдан ташқари сессиясида ушбу лойиҳа келгуси йилдан Боёвут туманида бошланишини маълум қилди. Омборнинг умумий сиғими 100 миллион куб метрга тенг бўлади.
Расмий маълумотга кўра, сув омбори ишга тушгач, Боёвут, Гулистон, Сайхунобод, Сирдарё ва Мирзаобод туманларидаги жами 110 минг гектар ерда йилига икки маҳал ҳосил олиш имконияти яратилади. Бу эса вилоятнинг қишлоқ хўжалиги ишлаб чиқаришида сезиларли ўсишга хизмат қилиши кутилмоқда.
Президент мелиаратив ҳолатни яхшилаш бўйича ҳам топшириқлар берди. Жумладан, вилоятдаги 16 минг километр узунликдаги зовурларни босқичма-босқич тозалаш белгиланди. Шунингдек, ҳозирда 200 минг гектарга яқин экин ерларининг кучли ёки ўрта даражада шўрлангани таъкидланиб, шўрланган ерларни соғломлаштириш бўйича пилот лойиҳа Сирдарёда синовдан ўтказилади.
Сессияда сув ҳисобини юритиш тизимини такомиллаштириш масаласи ҳам кўтарилди. Масъулларга Сирдарёни сув ресурслари бошқаруви бўйича намунали ҳудудга айлантириш вазифаси юклатилди.