Сурияда Башар Асад ҳокимияти тугаганининг бир йиллигига бағишланган кенг кўламли тадбирлар ўтказилди.
Бу ҳақда маҳаллий ОАВ хабар берди дейди oxu.az нашри.
Маълумотларга кўра, республикада “Озодлик куни” деб номланган санани нишонлаш учун мамлакатнинг турли ҳудудларида аҳоли марказий кўча ва майдонларга чиқишган.
Асосий байрамлар Дамашқдаги Умавийлар майдонида бўлиб ўтди, минглаб фуқаролар эрталабдан бошлаб ҳудудга тўпланди. Мамлакат Мудофаа вазирлиги томонидан Меззе шоссесида ҳарбий парад ташкил этилиб, аҳолига санъаткорлар чиқишлари, феерверклар ва турли жамоатчилик тадбирлари тақдим этилди. Худди шундай тадбирлар Алеппо ва бошқа йирик-кичик шаҳарларда ҳам бўлиб ўтди.
Дамашқда Умавийлар масжидида бомдод намозидан сўнг Сурия президенти Аҳмад аш-Шараа мамлакатдаги Баас партияси диктатураси қулаганининг бир йиллиги муносабати билан нутқ сўзлади. Президент бир йил муқаддам Сурия пойтахтига ҳарбий кийимда кирганини эслаб, ўша пайтдаги инқилоб хотираларини ёдга олди.
Нутқ давомида давлат раҳбари сурияликлар адолатсизликдан холи бўлган янги давр бошланиши, мамлакат бошидан кечирган оғир давр якунланганини таъкидлади. Шу биринчи дақиқаларда бошдан кечирган ғурур ва ифтихор туйғуларини халқ билан бўлишди.
Расмийларнинг таъкидлашича, кўплаб аҳоли учун юбилей сиёсий ўзгаришлар бошланиши, қочқинларнинг қайтиши ва инфратузилманинг босқичма-босқич тикланиши рамзига айланди.
Эслатиб ўтамиз, бир йил олдин Аҳмад аш-Шараа Суриянинг эски президенти Башар Асад ҳукуматини ағдариб мамлакатни эгаллаган эди. Ҳозирги вақтда Башар Асад Россиядан қўним топган. Унга ҳозир Россия ҳукумати томонидан сиёсатда фаолият юритиш ва омма олдига чиқиш тақиқланган. Аммо унинг ўғли ўзининг ижтимоий тармоғида Москвадаги университетда докторлик ишини қилаётганини айтиб чиқди.