Сурхондарёда 16 ёшли қизга шилқимлик қилган эркак 5 суткага қамалди
Маст ҳолатда бўлган фуқаро қўшни қизнинг йўлини тўсиб, рақамини сўраб, қўлидан ушлашга уринган.
Сурхондарё вилоятининг Жарқўрғон туманида вояга етмаган қизга нисбатан одобсиз хатти-ҳаракат қилган эркак суд томонидан маъмурий жавобгарликка тортилди. Бу ҳақда вилоят судлари ахборот хизмати хабар берди.
Аниќланишича, воқеа 2025 йил 7 сентябр куни содир бўлган. Маст ҳолатда бўлган фуқаро тўйдан қайтаётган вақтда 2009 йилда туғилган қўшни қиз билан йўлда тўқнашиб қолган. У қизнинг йўлини тўсиб, телефон рақамини сўраган ва қўлидан ушлашга уринган.
Суд мажлисида эркак қилган ишини қисман тан олган. У ўз сўзида “шилқимлик” ниятида бўлмаганини, бироқ маст ҳолатда ножўя ҳаракат қилганини айтган ҳамда қилган ишидан афсусда эканини билдирган.
Суд ҳолатни ўрганиб чиққанидан сўнг, фуқаронинг ҳаракатларини Маъмурий жавобгарлик тўғрисидаги кодекснинг тегишли моддалари доирасида баҳолаб, унга 5 сутка маъмурий қамоқ жазоси тайинлади.
