Кобулда гиёҳвандлар шифохонаси портлатилди: 400 киши ҳалок бўлди

Афғонистон ҳукумати Покистон ҳарбийларини Кобул шаҳридаги гиёҳвандликдан даволаш шифохонасига ҳаво ҳужуми уюштириб, камида 400 кишининг ўлимига сабаб бўлганликда айблади. Бу ҳақда Al Jazeera хабар берди.

 

“Толибон” ҳукумати вакилларига кўра, зарба Кобулдаги “Умар” номли реабилитация марказига маҳаллий вақт билан соат 21:00 атрофида берилган. Матбуот котиби ўринбосари Ҳамидуллоҳ Фитратнинг билдиришича, 2000 ўринли шифохонанинг катта қисми вайрон бўлган.

 

Дастлабки маълумотлар ҳужум оқибатида камида 400 киши ҳалок бўлганини, яна 250 га яқин фуқаро жароҳатланганини кўрсатмоқда. Қутқарув хизматлари воқеа жойида ёнғинни ўчириш ва вайроналар остидан жасадларни чиқариш ишларини давом эттирмоқда.

 

Воқеа гувоҳи, шифохона қўриқчиси Омид Станикзай ҳужумдан олдин осмонда ҳарбий самолёт овозлари эшитилганини айтди. 

 

“Атрофимизда ҳарбий қисмлар бор эди. Ушбу ҳарбий бўлинмалар самолётга қарата ўқ узганида, самолёт бомба ташлаган ва ёнғин чиққан. Ҳалок бўлганлар ва жароҳатланганларнинг барчаси тинч аҳоли вакиллари эди”, — деди у.

 

“Толибон” расмий вакили Забиҳуллоҳ Мужоҳид ушбу зарбани кескин қоралаб, Покистонни Афғонистон ҳаво ҳудудини бузишда ва тинч объектни нишонга олишда айблади. У бу ҳолатни “халқаро тамойиллар ва инсониятга қарши жиноят” деб атади.

 

Покистон томони эса айбловларни рад этди. Бош вазир Шаҳбоз Шариф матбуот котиби Мушарраф Зайдий Кобулда ҳеч қандай шифохона нишонга олинмаганини билдириб, бу даъволарни “асоссиз” деб атади.

 

Покистон Ахборот вазирлиги баёнотига кўра, 16 март куни амалга оширилган зарбалар фақат ҳарбий объектлар ва террорчилик инфратузилмасига қаратилган. Расмийлар ушбу объектлар Кобул ва Нангарҳор вилоятларида жойлашган бўлиб, Покистонга қарши ҳужумларда фойдаланилганини даъво қилмоқда.

 

Шунингдек, Исломобод Афғонистонни Покистонда фаолият юритаётган “Таҳрики Толибон Покистон” жангариларига бошпана беришда айблаб келмоқда. “Толибон” расмийлари эса бу иддаоларни бир неча бор инкор этган.

 

Ҳозирча воқеа юзасидан мустақил манбалар орқали тасдиқланган якуний маълумотлар мавжуд эмас. Вазият икки давлат ўртасидаги тарангликни янада кучайтириши мумкин.