Сурхондарёда 50 кг дан ортиқ “гашиш” олиб кетаётган икки шахс қўлга олинди

 

Давлат хавфсизлик хизмати Сурхондарё вилояти бўйича бошқармаси ҳамда вилоят Ички ишлар бошқармаси ҳамкорлигида ўтказилган тезкор тадбир давомида 1985 йилда Термиз шаҳрида туғилган шахс ўз бошқарувидаги “Собалт” русумли автомобилда 50 кг 978 грамм “гашиш” моддаси билан қўлга олинди. Шунингдек, унинг яшаш хонадонидан ҳам қўшимча 186 грамм “гашиш” моддаси олинди. Бу ҳақда ДХХ Zamon.uzga хабар берди.

 

Тадбир жараёнида унинг 1986 йилда туғилган, Шеробод туманида яшовчи жиноий шериги ҳам ушланди. Аниқланишича, улар афғонистонлик наркокурерлар томонидан айланма йўллар орқали мамлакат ҳудудига ўтказилган ушбу гиёҳвандлик воситаларини кейинчалик муомалага киритмоқчи бўлган. Таъкидлаш жоиз, ушбу қонунбузарлардан бири аввал гиёҳвандлик воситаларини сотиш билан боғлиқ жиноят, иккинчиси эса фирибгарлик жинояти учун судланган бўлсада, хатоларидан тегишли хулоса чиқармаган.

 

Мазкур йўналишда Тошкент шаҳрида ҳам қонунбузарлик ҳолати қайд этилди. Учтепа туманида яшовчи 2000 йилда туғилган фуқаро томонидан «Телеграм» мессенжери орқали пойтахт ҳудудида синтетик гиёҳвандлик воситалари сотилаётгани аниқланди. Давлат хавфсизлик хизмати Тошкент шаҳар бошқармаси ходимлари томонидан Ички ишлар бош бошқармаси билан ҳамкорликда ўтказилган тезкор тадбирда мазкур шахс 225 грамм “Alfa PVP” синтетик наркотик моддаси билан қўлга олинди.

 

Шундан сўнг, унинг 2005 йилда туғилган таниши ҳам 2 дона “Регапен” кучли таъсир қилувчи дори воситаси билан ушланиб, дастлабки суриштирувда ушбу дори воситасини Мирзо Улуғбек туманидаги дорихонадан сотиб олганини маълум қилди. Тадбир давомида дорихонанинг норасмий сотувчиси 14 дона “Регапен” дори воситасини мижозга 1 млн 200 минг сўмга сотаётган вақтида қўлга олинди.

 

Бундан ташқари, дорихонанинг ёрдамчи омборхонасидан 20 200 дона “Габатен”, 823 дона “Регапен”, 100 дона “Галара”, 4 дона “Торгабалин” каби таркибида кучли таъсир қилувчи модда бўлган, тегишли ҳужжатлари мавжуд бўлмаган дори воситалари ашёвий далил сифатида олинди.

 

Ҳозирда мазкур шахсларнинг барчасига нисбатан Жиноят кодексининг тегишли моддалари билан жиноят ишлари қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.